Tanging Tanglaw (Tula para sa mga OFW)

Sa maghapong walang humpay na pag-gawa
Katawang hapo at kulang sa kalinga
Hanap lang sa tuwina ay pahinga
Ngunit naisin man ay di magawa
Damit na nilabhan ay nasa kama

Madalas sa malayo nakatingin
Nagtatanong kung ano ang mithiin
Kalaguyo at kapiling ay dilim
Taghoy ng ulilang damdamin
Idinadaan sa buntung-hiningang malalim

Sa bawat pagpikit ng mga mata
Ala-ala ng mga iniwanang sinta
Na nakatunghay sa iyong gunita
Ang masidhing pangungulila
Kayakap mo hanggang umaga

Sa muling pagbangon, bakas ng luha
Na sa magdamag ay dumaloy sa mga mata
Pilit mong itatago para di makita
Dahil ika'y malakas sa tingin ng iba
Baon mo ay huwad na ngiti at tuwa

Sa agos ng buhay sa ibang bayan
Wala kang ibang pagpipilian
Mahirap man kailangan mong sabayan
Dahil sa balikat mo iyong pasan
Pangarap sa mga anak sa kinabukasan

Ikaw, ako, sila, tayo na nangangarap
Na sa ibayong dagat ay naghahanap
Asenso na sa sariling bayan ay mailap
Sa likod ng makapal na ulap
Tanging tanglaw ating maaapuhap.